Sa moun ja di!

« Sa vré i ni aktivité ba sé granmoun-lan, ba sa ki pé toujou sòti, maché ; men ba lézot-la ki ni pwoblem santé, fok ni plis koté pou mennen yo lajounen pou yo pé palé épi dot moun. Fok pa kité sé granmoun-lan tou sel, yo bizwen lanmou ; fok ba yo an plas adan fanmi-yo. Fok yo santi kò-yo pòtalan. Si jennes ka fè létid lot koté, fok yo kriyé manman-yo ou granmanman-yo pou yo pé palé, pou pa ped tet-yo. »

« Sa pa senp pies. Lajennes simié pati lotbò, poutan ni anlo travay pou sé granmoun-an, ki épi fanmi-yo (sa bien), ki adan épad (mwens bien), ki sel (ébé Bondié); dot ankò bizwen an kay espésial pou risivwè swen (pa ni anlo, oben yo chè). »

« Pou granmoun pa tou sel fok sé komin-la épi sé konstriktè-a pou fè dé kay mitwayen pou pèmet an yich viv koté granmoun-li. Ek fok sé kawtié-a viré twouvé tjè-yo, épi sé ti konmes-la ki ka mò ek dé koté pou yo pé maché ek fè ispò. Fok lateknoloji fè dé bagay mwen konplitjé pou sé granmoun-la, adapté yo pou fè bokantaj épi lé jenn. »

« Sé kèsion-tala red. Délè, sé fanmi-an pa ni asé lajan pou chaj papa-yo ek manman-yo. Délè yich sé granmoun-lan pati an Fwans lè yo té jenn pou genyen lavi-yo ek yo pa pé viré pas pwop yich-yo ek ti-yich yo enstalé an Fwans. Yo konstwi dé sant yo krié EHPAD. Mé sé moun-la pa bien la. Pa ni asé anplwayé pou otjipé di yo. Pou lé granmoun ki sel an mézon-yo sa red osi. Yo palé kité kay-yo éti yo ni tout labitid-yo. »

« Fok mété aktivité pou yo pa rété sel. Dans, téyat, kisasayésa. Fok pa lésé yo sel. »

« Fok la jennes fè aktivité épi yo pou yo pa tou sel. Fok pa la jennes abandonnen sé granmoun-lan. »

« Fok la jennes-nou déviré an péyi-a apré étid-yo pou yo sa otjipé sé granmoun-lan. »

« Mwen ni lenprésion ki jénes-nou pa ni gwan tan ek lé pli vié. Sa tris menm. Ich kon ti-ich pa ka djè aplé'w ni vizité'w oben yo ka pasé an kout van si yo bizwen an bagay. Sé konsi ou o ran dé oubli kon lé zansien té ka di. Menm lè yo ka vini wè'w, tout moun si pòtab pa ni bokantaj pawol 😭 »